mekelle airport

መቀሌ ያረፉት 40ዎቹ ታጣቂዎች ማንነት ታወቀ፡፡

እሑድ ሐምሌ 22 ቀን 2010 ዓ.ም. በኢትዮጵያ አየር ኃይል አውሮፕላን መቀሌ አሉላ አባነጋ ዓለም አቀፍ ኤርፖርት እንደደረሱ በቁጥጥር ሥር የዋሉት 40 ታጣቂዎች፣ የፌዴራል ፖሊስ የኤርፖርት ጥበቃ አባላት ናቸው፡፡

ሪፖርተር ‹‹ታማን ምንጮቹን›› ጠቅሶ እንደዘገበው የኤርፖርት ጥበቃ አባላት የታጠቁ ስለሆኑ በሲቪል አውሮፕላን ሊጓጓዙ ስለማይችሉ… በኢትዮጵያ አየር ኃይል አንቶኖቭ አውሮፕላን ቅዳሜ ዕለት ከደብረ ዘይት አየር ኃይል በመነሳት ቦሌ ዓለም አቀፍ ኤርፖርት እንዳረፉ ተናግሯል፡፡ በመቀጠልም ያሳፈራቸው አውሮፕላን ከቦሌ ወደ መቀሌ ኤርፖርት ቢቃረብም፣ በነበረው የአየር ሁኔታ ምክንያት ማረፍ ባለመቻሉ ተመልሶ ወደ ደብረ ዘይት ለመብረር ተገዶ ነበር፡፡

አውሮፕላኑ የቴክኒክ እክል የነበረበት በመሆኑ ተለውጦ በምትኩ L100 (C130) አሜሪካ ሠራሽ ኸርኩለስ አውሮፕላን በማግሥቱ 40 የኤርፖርት ጥበቃ አባላትን አሳፍሮ ወደ መቀሌ በሰላም ከበረረ በኋላ፣ የጥበቃ አባላቱን አውርዶ ወደ ደብረ ዘይት አየር ኃይል እንደተመለሰ ምንጮች አረጋግጠዋል፡፡

ይሁን እንጂ ለምን ተልዕኮ እንደተላኩ ጥርጣሬ ያደረበት የትግራይ ክልል ፖሊስ፣ የኤርፖርት ጥበቃ ዲቪዚዮን አባላቱን በቁጥጥር ሥር አውሎ ምርመራ በማድረግ ላይ እንደሆነ ታውቋል፡፡ ሁኔታው እንደተጣራ የጥበቃ አባላቱ ይፈታሉ ሲሉ ምንጮች ለሪፖርተር ተናግረዋል፡፡ ‹‹በመረጃ ልውውጥ የተፈጠረ ክፍተት የፈጠረው ችግር ነው፤›› ብለዋል ምንጮች፡፡
ነገር ግን… ጉዳዩን በተመለከተ ሪፖርተር የጠየቃቸው የትግራይ ክልል የኮሙዩኒኬሽን ጉዳዮች ቢሮ ኃላፊ አቶ ረዳዒ ኃለፎም፣ ‹‹ተራ አሉባልታ ነው›› ሲሉ ዜናውን አጣጥለውታል፡፡

—›

(source; Ethiopian reporter)

Facebook Comments

Post Author: መላኩ አላምረው

መላኩ አላምረው
Melaku Alamrew