Love but don't believe

‹‹ባትጠላውም ራቀው››

(መላኩ አላምረው)

—›

‹‹እስኪይዙ ቦታ፣ እስኪደላደሉ፤
ይስቋል ለጠላት፣ እንደወዳጅ ሁሉ፡፡››

እንደሚሉት አበው፣
.

‹‹ጥሩ ወዳጅ መስሎ፣ የቀረበህ ያ ሰው፤

ያንተ የሆነውን፣ ወስዶ ከጨረሰው፤

ብዙ ሳትገረም፣ ብዙም ሳትጃጃል፤

በፍጥነት ከእርሱ፣ መራቅህ ይበጃል፡፡

ፈጠን በል እንጅ ጃል…!

 

ጥርሱን እያሳዬ፣ ያለህን የሚነጥቅ፤

ወዳጅህ አይደለም፣ ጠላት ነው ተጠንቀቅ፡፡

 

ያለህን ጨርሶ፣ ወዳንተ ሳይመጣ፤

ከሕይወትህ ይራቅ፣ ከሕይወቱ ውጣ፡፡››

.

በማለት ልመክርህ፣ ሐሳቡ ነበረኝ፤

‹‹ጠላትህን ውደድ፣›› የሚለው ትዝ አለኝ!

 

ነገር ግን እንደ’ኔ…

‹‹ጠላትህን ውደድ፣›› የሚል ሕግ ቢኖርም፤

ሲጀመር ጠላትህ፣ ሕጉን አያከብርም፤

(በሥጋ ብትችለው፣ ነፍስህን አይምርም፡፡)

.

ሲቀጥል ይሄ ሕግ፡- ‹‹ጠላትህን›› ሲልህ፤

‹‹የትኛውን ጠላት?›› መጠየቅ አለብህ፡፡

 

እንደኔ፡-

የጠላት ዓይነቱ፣ በሁለት ይከፈላል፤

አንደኛው ግልጽ ነው፣ ደምህን ያፈላል፡፡

…..ታየዋለህ ፊቱን፣ በቃ ይጠላሃል፤

እርሱን ከቻልህ ውደድ፣ ጠላት ነው አውቀሃል፤

ምን አልባት ስትወደው፣ እርሱም ይወድሃል፡፡

 

ሁለተኛው ጠላት፣ ወዳጅ ነው በፊቱ፤

ክፉ አይናገርም፣ ማር ነው አንደበቱ፤

ይስቃል በጥርሱ፣ ሊገድልህ ከአንጀቱ፡፡

(አውሬ ነው ይሄስ….. ቱ….!)

 

አሁን ይሄ ጠላት፡-

ሲጀመር ባንተ ዘንድ፣ ወዳጅህ ነው እርሱ፤

በአንደበት አስመሳይ፣ ጠላት ነው በነፍሱ፡፡

 

ከአስመሳይ ሌባና፣ ከታወቀ ጠላት፤

የትኛው ይከፋል?

ነፍስህን ጠይቃት፣ ድንገት መልስ ካላት፡፡

 

እና በዚህ መሐል፣ ጠላት የሚለው ቃል፤

ከአንድና ከሁለት፣

ለየትኛው ቀርቦ፣ ለየቱ ይርቃል?

 

‹‹የትኛውም ይሁን፣ ጠላት ያው ጠላት ነው፤

ሁሉንም ስወድ ነው፣ በሕግ የምድነው፤››

የሚል ሐሳብ ካለህ፣

ሲጀመር ‹‹ሽሽ›› እንጅ፣ ‹‹አትውደድ›› ማን አለህ?

 

እያልሁህ ያለሁት…

ወዳጅ መስሎ ቀርቦ፣ የሚጎዳህን ሰው፤

ባወቅህበት ቅጽበት፣ እዛው ላይ መልሰው፡፡

 

‹‹መውደድ መጥላት፣›› ብለህ ሳታበዛ ጣጣ፤

ራቅ በል ከአካሉ፣ ከሕይወትህ ይውጣ፡፡

 

‹‹ጥላው›› አልወጣኝም፣ ‹‹ራቀው›› ብያለሁ፤

(መራቅ መጥላት እንደሁ፣ ግን በምን አውቃለሁ?)

 

አሁን ለምሳሌ፡-

ለጽድቅ ምናኔ፣ በመንፈሰ ዓለሙ፤

ከሰው ተለይተው፣ ለሕጉ የቆሙ፤

መለያየት እና መጣላት ትርጉሙ፤

……………ከተመሳሰለ………..

በል ተወኝ ወዳጄ፣ ሕግ አክባሪም የለ!

 

እነርሱ የዓለምን፣ ሕዝብ የተለዩት፤

በኃጢአት ቆሽሾ፣ በስብሶ ስላዩት፤

እንዳያስቀራቸው፣ ክፉ ሥራው ነጥቆ፤

ነፍስ ለማዳን እንጅ፣ ከኃጢአት ርቆ፤

ይህን ነፍስ ነጣቂ፣ የዓለም ወንበዴ፤

ጥለው ስለሄዱ፣ ጠልተውታል እንዴ?)

 

ግራ ይገባኛል፣ በእውነት አንዳንዴ፤

ሳይጠሉ መለየት፣ አይቻልም እንዴ?

 

እንዲያውም እንዲያውም፣

የመውደድ መጠኑ፣

የመጥላትም ልኬት፣ በግልጽ ባይታይም፤

በአካላዊ ስሌት፣

‹‹አለመራቅ›› ብቻ፣ ፍቅርን አያሳይም፡፡

 

ለእኔ የሚገባኝ፣ የሕጉ ትርጓሜ፤

‹‹አትጥላ›› እንጅ ‹‹አትሽሽ፣›› አይደለም ወንድሜ፡፡

 

ከጠላት መሸሸሽን፣ መጥላት ነው የሚሉ፤

ለምን አልባት ካሉ፡-

ሲኦል እየሄዱ፣ ከሰይጣን ይዋሉ፤

‹‹ጠላት አለመራቅ፣›› ይኸው ነው – ከቻሉ!

—›

(ከነፍጠኛ ስንኞች)

Facebook Comments

Post Author: መላኩ አላምረው

መላኩ አላምረው
Melaku Alamrew