Two Sinodos of Ethiopian Church

ቤተ ክርስቲያኗ በሁለት ፓትርያርኮች እንድትመራ የማድረግ መፍትሔ

ቤተ ክርስቲያኗ በሁለት ፓትርያርኮች እንድትመራ የማድረግ መፍትሔ

የኢትዮጵያ ኦርቶዶክስ ተዋሕዶ ቤተ ክርስቲያንን ስዱስ ሲኖዶስ ወደ ሁለት መከፈል ወደ አንድ ለማምጣት የተሻለው መፍትሔ “ሁለቱንም ፓትርያርኮች በአባትነት መቀበል” እንደሆነ ብፁዓን አባቶች ገለፁ።

በ VOA ውይይት ያደረጉት የአዲስ አበባው ሲኖዶስ አባል ብፁዕ አቡነ ፋኑኤል እና የአሜሪካው ሲኖዶስ አባል ብፁዕ አቡነ ዮሴፍ እንደገለፁት አሁን የቤተ ክርስቲያኗን አንድነት ለማምጣት ሁሉቱንም ፓትርኮች ከመቀበል የተሻለ መፍትሔ የለም። አንዱን ጥሎ ሌላውን ይዞ መሄድ የበለጠ ችግር ሊሆን ይችላልም ብለዋል።

ይህ የሲኖዶስ መከፈል የእምነት መከፈል አይደለም። ሃይማኖቷ አልተከፈለችም። የአስተዳደር ሥርዓቷ ነው ለሁለት የተከፈለው። ይህ የሲኖዶስ መከፈል በቤተ ክርስቲያኗ ዶግማ ላይ ያመጣው ልዩነት/ለውጥ የለም። ምን አልባት አንዳንድ የቀኖና ጥሰቶች እዛም እዚህም እንዳሉ ይታወቃል። ያው ይህን ችግር በቤተ ክርስቲካኗ ላይ ያመጣው የፖለቲካ ጣልቃ ገብነት እንደሆነ ግልጽ ሐቅ ነው። እናም አሁን ፖለቲካም ሆነ የአባቶች ድክመት ያመጣውን ይህን ችግር ለአንዴና ለመጨረሻ ጊዜ ለመፍታት ሁለቱንም ፓትርያርኮች በአባትነት ተቀብሎ እስከ ሕልፈተ ሕይወታቸው መቀጠልና እግዚአብሔር በፈቀደው ጊዜ ወደ አንድ ማምጣት ነው የሚል ስምምነት ያለ ይመስላል በሁለቱም ሲኖዶስ በኩል።

ይህ መሆኑ በራሱ የቀኖና ጥሰት አያመጣም ወይ? ከተባለ መልሱ አወ ያመጣል ነው። ለአንድ ቤተ ክርስቲያን አንድ ፓትርያርክ ነው አሁን ያለው ሥርዓት የሚያዝዘው። ነገር ግን ሥርዓቱን ሲኖዶሱ የማሻሻል ሥልጣን ስላለው ለአንድነቱ ሲባል ሊሻሻል ይችላል። ሲኖዶሱ ተከፍሎ ቢቀጥልም ያው ሥርዓቱ መጣሱ አይቀርም/ተጥሷልም። ስለዚህ ለተሻለው የአንድነት መፍትሔ… ለጊዜው ቤተ ክርስቲያኗ በሁለት ፓትርያትክ እንድትመራ አድርጎ የሚቆይ ሥርዓት ተሠርቶ በቀጣይ መስተካከል ይችላል። ይህ የአስተዳደር ሥርዓት ከመሠረተ እምነት/ዶግማ ጋር አይያያዝም። ዶግማ ማለት የቤተ ክርስቲያኗ የሃይማኖት/መሠረተ እምነት/ ትምህርት እንጅ አስተዳድራዊው የሲኖዶሱ የሥርዓት አይደለም። በመሠረቱ ዶግማን ሲኖዶስ ማሻሻል አይችልም። ሥርዓትን/ቀኖናን ግን የማሻሻል ሥልጣን አለው። ነገር ግን ሥርዓትም ሲሻሻል ዶግማን በፍጹም እንዳይነካ ተደርጎ ነው። ለምሳሌ ምንም ዓይነት ሥርዓት/ቀኖና የአምስቱን አዕማደ ምሥጢራት አስተምህሮ (ምሥጢረ ሥላሴ፣ ምሥጢረ ሥጋዌ፣ ምሥጢረ ጥምቀት፣ ምሥጢረ ቁርባን እና ምሥጢረ ትንሣኤ ሙታን) ሊሽግም ሊያሻሽልም አይችልም።

(የአርመን ኦርቶዶክስ ተዋሕዶ ቤተ ክርስቲያን በ3 ፓትሪያርክ ነው የምትመራው። እነርሱም የእኛ አይነት መከፋፈል ሲገጥማቸው አንድነቱን ለማስጠበቅ የተጠቀሙበት መፍትሔ ነው።)

እግዚአብሔር ለቤተ ክርስቲያን አንድነትን ያምጣልን!

ለሀገራችንም ሰላምን ያስፍንልን!

Facebook Comments

Post Author: መላኩ አላምረው

መላኩ አላምረው
Melaku Alamrew