Yohannes Mekonen

ከምር ግን ሀገሪቱ የማን ናት? የዜጎች ወይስ የቡድኖች? / መ/ር ኢ/ር ዮሐንስ መኮንን

እንኳንስ በአንድ ሀገር በአንድ ቤተሰብ ውስጥም የሚኖሩ አባላት የተለያየ ፍላጎት እና አመለካከት ቢኖራቸው የሚጠበቅ እና ተፈጥሮአዊ ነው። ነገር ግን ”እኔ እንደማምነው እመን። እኔ እንደምመርጠው ምረጥ” ብሎ አንደኛው ሌላኛውን መብት እና ፍላጎት በማስጨነቅ እና በማስገደድ የጫነበት እንደሆነ ወንጀልም አደጋም ይሆናል። እኔ በግሌ በዜግነት እና በግለሰብ ነጻነት (ሰው በመሆን) ላይ የተመሠረተ ፍልስፍናን የምትከተል ሀገር እንድትኖረኝ የምመኘውን ያህል በብሔር ማንነት ላይ የተደራጁ እና የቡድኖችን መብት በመምረጥ የተሰለፉ እንዳሉ ልክድ አይቻለኝም። እውነታውንም መቀበልም ይኖርብኛል። ሁለቱም እኩል የመደመጥ መብት ሊሰጣቸው ይገባል እላለሁ።

በዚህ መሠረታዊ የአስተሳሰብ መርህ ከተስማማን ላለፉት 27 ዓመታት በሀገራችን በሥልጣን ላይ የቆየው ሥርዓት መንግስታዊ ሥልጣንን እና የኢኮኖሚ እድሎችን በብሔር ለተሰባሰቡ ማንነቶች እና ለቡድን መብት አቀንቃኞች ጠቅልሎ በመስጠቱ ሌሎች ድምጾች ፈጽሞ የመደመጥ እድል ተነፍጓቸው ቆይቷል። እንግዲህ እኔ ጥያቄዬ ከዚህ ይጀምራል።

1) ከብሔር ይልቅ ”ኢትዮጵያዊ ዜግነት ይገልጸናል” ለሚሉ እና በግለሰብ መብት የሚያምኑ ዜጎችን ሀገሪቱ እንደ ዜጋ ታውቃቸዋለች? ህገመንግስቱስ ያውቃቸዋል? አሁን ባለው ሁኔታ ሥልጣን (power) ሊያገኙ እና አመለካከታቸውን ሊያራምዱ የሚችሉበት በር በብሔር ከረጢት ካልታጨቁ ሙሉ በሙሉ ዝግ እንደሆነባቸው ይሰማኛል።,/p>

2) ሥልጣን እና ሃላፊነትን በብሔር ኮታ አከፋፍለን ስናበቃ ተጠያቂነትን ግን በግለሰብ ደረጃ ማውረድ ይቻላል ወይ? ምክንያቱም ተጠያቂነት ሲመጣ ሁሉም ወደየ ብሔር ዋሻው ሮጦ ስለሚገባ የቡድኑ አባላትም ወንጀለኛውን ተጠያቂ ከማድረግ ይልቅ ”የኛ ወገን ተነካ” በሚል ስሜት ስለሚከላከሉለት ተጠያቂ ማድረግ ቸግሯል። እየሆነ ያለውም ይኸው ነው።

Facebook Comments

Post Author: መላኩ አላምረው

መላኩ አላምረው
Melaku Alamrew