Nile Fall Tis Isat

ወንዙ ጉዞውን ይቀጥላል፤ ምንጮችም የገባርነት ግዴታቸውን ይወጣሉ።

ወንዙ ጉዞውን ይቀጥላል። ምንጮችም ገባርነታቸውን አምነው ለወንዙ ውኃን ያዋጣሉ።
ወንዝነት እንደ ዓባይ ነው። ዓባይ ስሙንም ክብሩንም ሞገሱንም እንደያዘ ይጓዛል። ምንጮች ወደ ዓባይ የመደመር ዕድል ብቻ ነው ያላቸው። ሲደመሩ የዓባይን መጠን ያገዝፉታል። ግርማ ሞገስ ይጨምሩለታል። የምንጮች ወደዋናው ወንዝ ወደ ዓባይ የመደመርና የመገበር ጉዳይ የተፈጥሯዊ ግዴታ እንጅ ውዴታ አይደለም። ስማቸውም ክብራቸው ዓባይ ነው። ዋና መታወቂያ ምልክታቸው ነውና።
.
ምንጮቹ የዓባይን መነሻም መድረሻም አይወስኑም። ሲደመሩም ሲቀነሱም በየራሳቸው ልክ የመጠን ለውጥ ብቻ ያመጣሉ። ምንጮች በዓባይ ስምነት ይጠራሉ እንጅ የራሳቸውን ስም በዋናው ወንዝ ላይ ሊሰይሙ አይችሉም። በዓባይ ክቡርነት ልክም ይከብራሉ እንጅ የማናቸውም ክብር ዓባይን መብለጥ አይችልም።
.
ምንጮች ዓባይን የማደፍረስ አቅም ግን ይኖራቸዋል። በተለይ ጊዜያዊ/ወቅታዊ ማደፍረስ የምንጮች ተግባር ነው። ሰማይ በዳመነ ምድር ባጎረፈች ቁጥር ከየሚነሱበት አካባቢ ይዘውት የሚመጡትን ቆሻሻ መጨመራቸው ስለማይቀር ገባሮች በተደመሩ ቁጥር የዓባይ መደፍረስ ይጠበቃል። በተለይም በጨለማው ክረምት መደፍረስ ይበዛል። ነገር ግን ዓባይን መደፍረስ አያስደነግጠውም። እንዲያውም በመደፍረስ ወቅት የበለጠ አቅም ይፈጥራል። በሓይል ይወረወራል። (ለወንዝ መደፍረስ ብርታትን እንጅ ድካምን አምጥቶ አያውቅም።) ዓባይ ሲደፈርስ ጉዞውን ከፍ ባለ በግርማ ሞገስ ይቀጥላል፤ ያፈጥነውማል። ከዚያም ድፍርሱ እየጠራ ይሄዳል። አፈርና አሸዋው ይዘቅጣል። ንፁህ ዓባይነት ይጎላል።

Facebook Comments

Post Author: መላኩ አላምረው

መላኩ አላምረው
Melaku Alamrew