Ppe Mathias and Pope Merkorios

የቤተ ክርስቲያን ሲኖዶሳዊ አንድነት ተመለሰ፤ የሰላም ኮሚቴው ብሥራቱን ያውጃል፤ ልኡካን አባቶች ስምምነቱንና አፈጻጸሙን ያስታውቃሉ

“የብፁዕ ወቅዱስ አቡነ መርቆሬዎስ ጉዳይ እልባት አግኝቷል፤”

“የተሾሙ ሊቃነ ጳጳሳት ወደ ሀገር ገብተው በተመደቡበት ይሠራሉ፤”

“በሁለቱም በኩል የተላለፈው ቃለ ውግዘት በአንድነት ይነሣል፤”

/የሰላም አንድነት ኮሚቴው አባል/

†††

ከኹለት ዐሥርት ዓመታት በላይ የቤተ ክርስቲያናችንን አስተዳደር ከፋፍሎት የቆየው ሲኖዶሳዊ ልዩነት፣ በዕርቀ ሰላም ወደ አንድነት መመለሱ ተበሠረ፡፡
ሲኖዶሳዊው የዕርቀ ሰላም ጉባኤ፣ ትላንት እሑድ፣ ሐምሌ 15 ቀን 2010 ዓ.ም.፣ በዋሽንግተን ዲሲ ደብረ ኃይል ቅዱስ ገብርኤል ቤተ ክርስቲያን፣ የሁለቱም ልኡካን አባቶች በተገኙበት የጋራ ጸሎትና የመክፈቻ መርሐ ግብር የተጀመረ ሲኾን፣ ወደ ውይይቱ በተገባበት ዛሬ ሰኞ፣ ሐምሌ 16 ቀን 2010 ዓ.ም. የግማሽ ቀን ውሎ ከስምምነት ላይ መደረሱ ተበሥሯል፡፡
ልኡካን አባቶች በደረሱበት የዕርቀ ሰላም ስምምነት መሠረት፣ ላለፉት 26 ዓመታት የሀገር ቤትና የስደት ሲኖዶስ በሚል የቆየው ልዩነት የመጨረሻ እልባት አግኝቷል፤ ከዚህ በኋላም የቤተ ክርስቲያናችን አስተዳደራዊ አንድነት በመመለሱ እንደ ቀድሞው በአንድ ሲኖዶስ የበላይነት የምትመራ ይኾናል፡፡

“ስምምነት ላይ ተደርሷል፤ አሁን ደስታ ዐውጁ ተብሎ ደስታውን ለማወጅ እየተዘጋጀን ነው፤” ያሉት የሰላምና አንድነት ኮሚቴው አባል፣ የስምምነቱን ዝርዝርና አፈጻጸሙን፣ ልኡካን አባቶች በአንድነት ኾነው በሚሰጡት መግለጫ በይፋ እንደሚያስታውቁ ተናግረዋል፡፡
ስምምነቱ፣ የአራተኛውን ፓትርያርክ ብፁዕ ወቅዱስ አቡነ መርቆሬዎስን ጉዳይ፣ ከልዩነቱ በኋላ በሀገር ውስጥና በውጭ የተሾሙ አባቶችንና በሁለቱም በኩል የተላለፈውን ቃለ ውግዘት እንደሚያካትት የኮሚቴው አባል ጠቁመዋል፡፡

የቅዱስነታቸው አቡነ መርቆሬዎስ ጉዳይ እልባት ያገኘበትን ኹኔታ ባይገልጹም፣ “በሁለቱም በኩል የተላለፈው ቃለ ውግዘቱ በአንድ ላይ ይነሣል፤ በውጭ የተሾሙ ብፁዓን ሊቃነ ጳጳሳትም ወደ ሀገር ቤት ገብተው በተመደቡበት ይሠራሉ፤” ብለዋል አባሉ፡፡

—›

(ምንጭ፡ ሐራ ተዋሕዶ)

Facebook Comments

Post Author: መላኩ አላምረው

መላኩ አላምረው
Melaku Alamrew